Psa 141 | TpiKJPB | STEP | Wanpela Sam bilong Devit. ¶ BIKPELA, mi singaut long Yu. Yu mas hariap na kam long mi. Yu mas harim nek bilong mi, taim mi singaut long Yu.

Psalms 141

Wanpela Sam bilong Devit.

1 ¶ BIKPELA, mi singaut long Yu. Yu mas hariap na kam long mi. Yu mas harim nek bilong mi, taim mi singaut long Yu. 2 Larim prea bilong mi i ken stap long pes bilong Yu olsem paura i gat switpela smel. Na pasin bilong litimapim han bilong mi i ken stap olsem sakrifais bilong apinun tru. 3 O BIKPELA, Yu mas putim wasman long maus bilong mi. Yu mas lukautim dua bilong maus bilong mi. 4 Yu no ken larim wanpela samting nogut i pulim bel bilong mi long mekim ol wok i nogut tru wantaim ol man i mekim sin nogut. Na Yu no ken larim mi kaikai hap bilong ol naispela kaikai bilong ol. 5 ¶ Stretpela man i ken paitim mi. Dispela bai i stap pasin bilong mekim gut. Na em i ken krosim mi. Dispela bai stap wel i nambawan tru, na bai em i no brukim het bilong mi. Long wanem prea bilong mi bai stap yet long ol bagarap bilong ol. 6 Taim ol i daunim ol jas bilong ol long ol ples ston, bai ol i harim ol tok bilong mi, long wanem ol dispela i swit. 7 Ol man i bin tromoi nabaut ol bun bilong mipela klostu long maus bilong matmat, olsem taim man i katim na brukim diwai long graun. 8 Tasol ol ai bilong mi i lukluk i go long Yu, O GOD Bikpela. Bilip bilong mi i stap long Yu. Yu no ken larim tewel bilong mi i stap sot tru. 9 Yu mas holimpas mi i stap longwe long ol samting bilong pasim lek ol i bin putim bilong kisim mi na ol samting bilong pulim mi bilong pasim mi i bilong ol wokman bilong sin nogut. 10 Ol man i nogut tru i ken pundaun long ol umben bilong ol yet, taim mi ranawe tasol.